عشان أنت مصرى .............

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى



عشان انت مصرى العذاب بينديك
بتبدأ فى يومك حاجات بترازيك
فى نومك فى قومك تعكنن عليك
تديقك ولسه العماص فى عنيك
مافيش ميه تشطف صابونه فى اديك
وجسمك ملزق ورحتك عاديك
فتلبس وتنزل وفيك اللى فيك



ورايح لشغلك هتحتاج مواصله
ادى المترو واقف وكهربته فاصله
وفى الميكروباص فى خناقه حاصله
اوتوبيس فرامله عايزالها واصله
وتوكتوك ده اتيه ومحتاج لبوصله



بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دامغه ضايعه وملف اتسرق
وفى كام مواطن عملك قلق
بيشكى تقوله روح اندعق
وعاركه وهوجه وشاى اندلق
ومخك خلاص من الصداع اتغلق



هترجع لبيتك ده لوكان فى بيت
هتوصل هتندم يريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى يا ناس اتهريت
ولا حد سمعك مهما هاتيت



عشان انت مصرى وده للاسف
فلازم تأسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف



مش انت اللى مصرى ؟؟؟؟؟